မိူဝ်ႈဝၼ်းထိ 27.09.2026 ၼၼ်ႉ လႆႈၸတ်းႁဵတ်းပၢင်ၵုမ်လူင် တႃႇၶွတ်ႇၽွတ်ႈ လႄႈ မၵ်းမၼ်ႈ “ၵေႃလိၵ်ႈလၢႆး လႄႈၽိင်ႈငႄႈတႆး တူင်ႇဝဵင်းလွႆလႅမ်”တမ်ႈတီႈ ႁူင်းထမ်းလူင် ၵျွင်းထၢတ်ႈတေႃႇ ဝဵင်းလွႆလႅမ် ဢွင်ႇမၢၼ် ယဝ်ႉတူဝ်ႈၵႂႃႇလီငၢမ်းယူႇယဝ်ႉ။
ပၢင်ၵုမ်ဢၼ်ၼႆႉ လႆႈတႄႇႁဵတ်း မိူဝ်ႈဝၢႆးဝၼ်း 1 မူင်းသေ ၸဝ်ႈသြႃႇလူင် တွၵ်ႉတိူဝ်ႇ ပၺ်ၺႃၼၼ်ၻ လႆႈပၼ်ဢေႃးဝႃႇတ ပိုတ်ႇပၢင်ၵုမ်မွၵ်ႇလၢတ်ႈဝႃႈ "ၵၢၼ်လိၵ်ႈလၢႆးလႄႈၽိင်ႈငႄႈသၢႆၸႂ်ၶိူဝ်းၼႆႉ ပဵၼ်ၼႃႈၵၢၼ် ၵေႃလိၵ်ႈလၢႆးယဝ်ႉၼႆသေ ႁႂ်ႈလႆႈဢွၼ်ၵၼ်သိုပ်ႇဢဝ်ပုၼ်ႈၽွၼ်း ထိင်းသိမ်းၵႂႃႇမိူဝ်းၼႃႈႁႂ်ႈတိူဝ်းတွၼ်းၶိုၼ်ႈယႂ်ႇၵႂႃႇၼႆသေ" ပိုတ်ႇပၢင်မွၵ်ႇလၢတ်ႈပၼ်ဢေႃးဝႃႇတ ၼင်ႇၼႆၵႂႃႇယူႇယဝ်ႉ။ သိုပ်ႇၼၼ်ႉ တၢင်တူဝ်ၸုမ်းပွင်ၵၢၼ် လႆႈသပ်းလႅင်းၼႄ လွင်ႈတၢင်းလႄႈ လွင်ႈလႆႈ ၸၢတ်ႈႁဵတ်း ပၢင်ၵုမ်လူင်ၵႂႃႇယူႇ။ လိူဝ်သေၼၼ်ႉ ယူႇတီႈ ၽူႈၼမ်းၼႃႈ ဢၼ်ပဵၼ် ၼႃယၵႁဝ်းၶႃႈ ပေႃႈလုင်းၸၢႆးသေး ၵေႃႈလႆႈ မွၵ်ႇလၢတ်ႈၶေႃႈၵႂၢမ်း တူင်ႉတၵ်ႉထိုင်ၽူႈၶိုၼ်ႈႁွတ်ႈပၢင်ၵုမ်သေ၊ ဝၢႆးသေၼၼ်ႉ ၸုမ်းပွင်ၵၢၼ်ႁဝ်းၶႃႈ လႆႈသပ်းလႅင်းၸႅင်ႈၼႄ ပိူင်ၶွတ်ႇၽွတ်ႈ လႄႈ လၵ်းၼမ်း ၵၢၼ်ငၢၼ်း ႁူမ်ႈပႃး ယိူင်းဢၢၼ်း၊ တႃႈမုင်ႈ ၵေႃလိၵ်ႈလၢႆး ႁဝ်းၶႃႈ ၼင်ႇႁိုဝ် ႁႂ်ႈပီႈၼွင်ႉၶဝ် ႁပ်ႉႁူႉသေမၢႆတွင်း ၵႂႃႇယူႇယဝ်ႉ။
ၸွမ်းၼင်ႇမၢႆၶပ်ႉ ပၢင်ၵုမ်သေ ၽူႈၶိုၼ်ႈႁွတ်ႈပၢင်ၵုမ်တင်းသဵင်ႈ လႆႈဢုပ်ႇၵုမ်ၵၼ် လွင်ႈ Logo မိၵ်ႈမၢႆ လႄႈ မၵ်းမၼ်ႈတႅပ်းတတ်း ၸုမ်းပွင်ၵၢၼ် ၵေႃလိၵ်ႈလၢႆးလႄႈ ၽိင်ႈငႄႈတႆး တူင်ႇဝဵင်းလွႆလႅမ်ၼႆႉ ပဵၼ်တၢင်းၵၢၼ်ၵႂႃႇယူႇယဝ်ႉ။

ပၢင်ၵုမ်လူင်ပွၵ်ႈၼႆႉ ၼွၵ်ႈလိူဝ်သေပီႈၼွင်ႉ ၼႂ်းဝဵင်းလွႆလႅမ် ၵူႈပွၵ်ႉပွၵ်ႉဢမ်ႇၵႃး၊ ႁူမ်ႈပႃးပီႈၼွင်ႉ သပ်ႇဝဵင်းလွႆလႅမ်တင်းသဵင်ႈ ၶဝ်ႈပႃး မူႇဝၢၼ်ႈၵူႈဝၢၼ်ႈ ဢၼ်ယူႇႁိမ်းႁွမ်းဝဵင်းလွႆလႅမ် ဢမ်ႇယွမ်း 160 ၵေႃႉသေ လႆႈဢွၼ်ၵၼ်မႃးၶိုၼ်ႈႁွတ်ႈ ပၼ်ႁႅင်း လႄႈ တၢင်းၶႆႈၸႂ် ႁူမ်ၸူမ်းၸွမ်း ဢဝ်ၵုင်ႇမုၼ်ယႂ်ႇၼမ် တီႈလႆႈၶွတ်ႇၽွတ်ႈပဵၼ်မႃး ၵေႃလိၵ်ႈလၢႆးလႄႈၽိင်ႈငႄႈတႆး တူင်ႇဝဵင်းလွႆလႅမ် ၼႆႉယူႇယဝ်ႉ။













